Vieiros

O PNV celebra o domingo o Alderdi Eguna, día do partido, en Foronda (Araba). A xornada está marcada pola recende renuncia á reelección do actual presidente da formación, Josu Jon Imaz, e pola consulta que anunciou o lehendakari, Juan José Ibarretxe.

O Partido Nacionalista Vasco atópase nun proceso de negociacións para presentar unha candidatura única de consenso ao Euskadi Buru Batzar, que se elixirá na asemblea do 1 e 2 de decembro. A negativa de Joseba Egibar a optar á presidencia tamén complicará a decisión.

O acto central do Alderdi Eguna serán os discursos do aínda presidente Josu Jon Imaz e mais o lehendakari Juan José Ibarretxe, que de seguro volverá falar da consulta sobre a soberanía vasca que anunciou para o 25 de outubro de 2008.

En Foronda reuniranse representantes dunhas 18 organizacións políticas de todo o mundo, como o BNG, representado polo seu portavoz nacional, Anxo Quintana, Convergència Democràtica de Catalunya, Unió Mallorquina, Bloc Nacionalista Valencià, Coalición Canaria, a Fronte Polisario ou o Partitu di a Nazione Corsa.

Declaracións de Quintana
Anxo Quintana afirmou que o estado español se atopa "nun momento político importante, no que está en xogo o deseño futuro do modelo de Estado; Galiza ten que estar presente". E o único xeito de ter presenza é "que o BNG estea na política estatal con forza dominante".

En referencia ao nacionalismo, Quintana criticou "a satanización destas propostas e o emprego da Constitución coo arma arreboladiza en defensa dunha España unitaria e unitarista", dos que dixo que "non servan para nada". Porén, volveu deixar claro que "Euskadi e Galiza son países diferentes e por tanto os ritmos políticos son distintos".