Vieiros

Raña conseguiu o seu cuarto título de campión de España de triatlón após imporse na proba celebrada o domingo en Úbeda (Xaén).

O galego, que foi campión do mundo en 2002, xa tiña gañado o campionato nacional nas edicións de 2001, 2002 e 2004 e conseguiu a prata en 2003 e 2005. Desta vez el era o principal candidato para se facer co ouro, ante a ausencia de Gómez Noya que tomou un tempo de descanso e non se presentou á proba. Raña dominou, excepto en natación, onde foi undécimo. Enriba da bici e na carreira a pé foi moi superior.

Pilar Hidalgo conseguiu o bronce
Nunha carreira na que venceu a guipuscoana Ainhoa Murua -que conseguiu o seu primeiro título de campioa, após dous segundos postos en 2006 e 2005 e de un terceiro en 2004-, a galega Pilar Hidalgo, do Cidade de Lugo, acadou o bronce, a súa quinta medalla nas 8 eidicións do campionato estatal nas que participou.

Hidalgo é outras das especialistas do triatlón estatal, campioa en 2003 e 2004 e prata en 2000 e 2002.