Vieiros

Vieiros de meu Perfil


Edición xeral

RSS de Edición xeral
Venezuela recibe asesoría do concello en troque

Os máis pobres de Londres xa viaxan con petróleo venezolano

Este luns entrou en vigor o acordo de colaboración asinado en febreiro entre o alcalde da cidade e Hugo Chávez, que beneficiará a miles de londinienses e de venezolanos.

Redacción - 11:30 22/08/2007
Livingstone e Chávez, en Londres

Livingstone e Chávez, en Londres

Dende este luns, até 250.000 londinienses que gozan dalgún subsidio estatal, tal como nais e pais solteiros, impedidos e xente cunha baixa permanente poderán viaxar nos autobuses e tranvías da cidade á metade de prezo, grazas ao acordo asinado entre o concello da capital inglesa e o goberno de Venezuela o pasado mes de febreiro.

A medida, negociada xa dende 2006 entre o alcalde de Londres, Ken Livingstone, e o presidente venezolano, Hugo Chávez, en representación de Petróleos de Venezuela Europa -sucursal europea da empresa estatal PDVSA- provocou certa controversia, debido ás críticas da dereita londiniense.

Máis de 400 euros por persona

O acordo consiste na subministro de petróleo venezolano para os buses de Londres cun 20% de desconto no seu prezo, a cambio de asesoría da alcaldía de Londres a Venezuela en eidos como o transporte público, a planificación urbana, a protección ambiental, a xestión de residuos e a promoción do turismo e de actividades culturais.

Livingstone dixo que o convenio -que representará un subsidio venezolano de ata 32 millóns de dólares anuais (máis de 23,5 millóns de euros)- permitirá que os londinienses con menos recursos económicos reciban un beneficio de até 555 dólares por ano (409 euros).

Porén, a líder do Partido Conservador da Asemblea de Londres, Angie Bray, describiu ao presidente de Venezuela, Hugo Chávez, como "un ditador cun monstruoso historial nos dereitos humanos", e considerou "moralmente inxustificábel desviar os recursos que se necesitan para aliviar a extrema pobreza", na que segundo ela vive gran parte da poboación venezolana.

'Ken, o Vermello'
O alcalde, a quen os seus adversarios alcuman Ken, o Vermello polas súas posturas de esquerda, sinalou, pola súa banda, que "francamente, preferiría ir para a cama con Chávez que, tal e como fixo o goberno británico, con George W. Bush".

Ademais, segundo declaracións anteriores de Livingstone, o acordo tamén é positivo para Venezuela xa que "emprega as súas riquezas petroleiras para beneficio da maioría da súa poboación, que vive en cidades, dándolle prioridade a áreas como a mellora da saúde pública e o medio ambiente, o transporte público, a vivenda e a planificación".

"Isto transformará gradualmente a calidade da vida da maioría da poboación de Venezuela, incluíndo transformación das vilas deprimidas por outras modernas con servizos públicos de primeira clase", afirmou Livingstone, e engadiu ao respecto que "Londres ten unha gran experiencia neste campo, e a súa asesoría aforraralle a Venezuela millóns de dólares".


4.25/5 (12 votos)

Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí: