Vieiros

Mentres Francisco Cacharro dispara desde os medios de comunicación contra a dirección do PPdeG e especula coa súa posíbel saída do partido e mesmo coa presunta entrada noutra formación política, os rexedores que o PPdeG mantén na provincia afástanse cada vez máis del. Ao tempo, o presidente provincial dos populares, Xosé Manuel Barreiro, quen deixou recentemente o seu escano no Parlamento para liderar a oposición na Deputación de Lugo e ao tempo pilotar a renovación do PPdeG lugués, convida a Cacharro a deixar o Partido Popular.

Varios alcaldes convidan a Cacharro a marchar
"Son impresentábeis e imperdoábeis", asegurou para Europa Press o alcalde de Quiroga e ex vicepresidente da Deputación de Lugo, Xulio Álvarez, sobre as recentes declaracións de Francisco Cacharro. "Non está ben que faga declaracións que non veñen a conto", asegurou ao tempo que instaba a Cacharro a "falar dentro dos órganos do partido e non a través dos medios de comunicación". "Os destinos políticos cambian de rumbos", comentou Álvarez, pedíndolle a Cacharro que "cale" e "sexa fiel" ao partido.

Outro vello aliado no sur da provincia, Xesús Ramos, alcalde de Taboada, chamouno a "aceptar" os resultados dos órganos do partido e esixiulle que "remate con este tipo de declaracións". "Paréceme moi desafortunado o que fixo e non procede", expresou Ramos, "xa durante o período electoral dixo algunha cousa que prexudicou ao partido e non podemos compartir o que fai", indicou. "Non favorece en absoluto ao partido e non é bo para nós", dixo ao respecto Antonio Muiña, alcalde de Friol e tamén ex vicepresidente da deputación.