Vieiros

O colectivo Encontro Irmandiño conta dende esta fin de semana cunha coordinadora nacional. O que comezou o ano pasado como unha corrente crítica dentro do BNG de cara á última Asemblea Nacional, toma corpo agora dentro da organización frontista.

Xosé Manuel Beiras, un dos principais militantes de Encontro Irmandiño, asegurou este sábado que o obxectivo último é evitar a “ameaza autonomista” dentro do Bloque. Beiras insistiu que a organización frontista ten que camiñar cara “a emancipación nacional e social de Galiza”. Outro dos eixes de acción é o asemblearismo. Unha das decisións que chama máis a atención é que para formar parte da nova organización non vai ser requisito indispensábel militar no BNG.

A asemblea constituínte elixiu unha coordinadora na que, ademais de Beiras, figuran, entre outros, Cristina Amor, Mario López Rico, Martiño Noriega e Luis Eyré. Agárdase que cara finais de ano Encontro Irmandiño celebre a súa primeira asemblea nacional.