Vieiros

O proceso iniciouse xa en 2006 e a reflexión que propón inclúe a diagnose do sector, a definición das políticas públicas necesarias e a participación de todos os organismos e institucións que teñan que ver co teatro.


A propia elaboración deste Plan Galego das Artes Escénicas, PGAE, responde a unha demanda historicamente reiterada do sector e non atendida até o de agora. O borrador coñecido o pasado mes de xuño propón varias claves: promover e potenciar as industrias vencelladas ás artes escénicas; fomentar e consolidar procesos de innovación na creación e xeración de contidos; garantir a accesibilidade dos públicos ás actividades artísticas e a integración das artes escénicas na vida comunitaria; consolidar o mercado de artes escénicas, e promover a internacionalización económica e cultural.


Algunhas interesantes propostas concretas xa avanzadas son a creación dun programa cultural específico no ámbito das escolas para a adquisición desde cativos do hábito de consumo de teatro ou o deseño de proxectos de animación sociocultural dirixidos a colectivos con risco de exclusión social. Ademais, o PGAE ampliará a rede de espazos escénicos e potenciará a colaboración entre eles.


Para participar na elaboración do PGAE poden enviarse as suxestións ao enderezo igaem@xunta.es.