Vieiros

A cita este luns do secretario xeral de Emigración da Xunta, Manuel Luís Rodríguez, co director xeral de Emigración do goberno español, Agustín Torres, non serviu para que o Ministerio de Traballo estabelecese un compromiso firme coa revisión da limpeza do censo de emigrantes.

Desde o goberno español din que con probabilidade a depuración chegará a tempo para as próximas eleccións galegas, que de non haber adianto terán lugar en xuño de 2009, e indican que "non se descarta" para antes das próximas eleccións xerais, previstas para marzo. Así e todo, e aínda que Manuel Luis Rodríguez sinalou a urxencia de facer desaparecer do debate as "suspicacias" arredor da participación dos emigrantes nos comicios, non existe un plan concreto para levar a cabo as correccións. Malia iso, Rodríguez falou de "receptividade" en Madrid e asegurou que Traballo vaille trasladar ao Ministerio de Asuntos Exteriores a necesidade de que "coa maior brevidade" se proceda ás xestións necesarias para lograr unha depuración "definitiva" do CERA, onde hai inscritos 319.074 galegos.

"Mortos" inscritos e cidadáns "duplicados"
O voceiro en materia de emigración do BNG, Iago Tabarés, pediu explicacións e esixiu responsabilidades ao secretario xeral de Emigración, Manuel Luís Rodríguez, polas irregularidades no CERA. Censurou Tabarés que mentres que durante a campaña electoral do 2007 se publicou que as inscricións indebidas no CERA supoñían un 15% do total, agora comunícase que "a cifra é do 30%".

Tabarés denunciou que son moitos os mortos inscritos e as inscricións duplicadas de emigrantes retornados que se poden atopar no CERA e que configuran así unha realidade "vinculada ao feito de que o voto no exterior se exerce por procedementos que non garanten a personalidade nin a identidade no seu exercicio".