Vieiros

A arqueoloxía subacuática será o quinto piar da Rede Galega de Patrimonio Arqueolóxico (RGPA). Segundo informou este martes a conselleira de Cultura, Ánxela Bugallo, o departamento terá a súa sede en Vigo, nunhas dependencias anexas ao Museo do Mar.

O parque dedicado á arqueoloxía subacuática complementará os outros catro da rede, especializados en arte rupestre, megalitismo, cultura castrexa e mundo romano. As novas instalacións contarán con persoal e equipos técnicos especializados na investigación de xacementos submarinos e encargaranse de protexer o patrimonio cultural somerxido de todo o país.

Cultura leva un ano catalogando os xacementos subacuáticos, procurando información bibliográfica e contrastando as referencias sobre barcos afundidos e, ademais, efectuando inmersións para actualizar os datos existentes. Este ano investiranse máis de 125.000 euros nas prospeccións, que se desenvolverán principalmente na ría de Vigo e no Parque das Illas Atlánticas. O traballo levará máis dun ano, o que permitirá tomar medidas para a protección dos bens submarinos.