Vieiros

Cos galegos David Cal, Teresa Portela, Carlos Pérez, Jovino González e David Mascato, entre outros, a selección estatal ten case asegurada algunha medalla. Os deportistas comezarán hoxe as probas, estreando, a nivel internacional, as novas pistas de Pontillón do Castro, en Xeve-Verducido (Pontevedra).

Durante a comparecencia na segunda feira ante os medios, o presidente da Federación Española de Piragüismo, Santiago Sanmamed, dixo que van afrontar o Europeo de Verducido sen ambición ningunha: "Non viñemos por medallas, mais tampouco imos renunciar a elas. O que nos importa de verdade é o Campionato do Mundo, que é clasificatorio para as Olimpiadas de Pekín", polo que non está nos seus planes forzar o equipo, aínda que se veñen as medallas, ben recibidas serán.

Outro dos obxectivos: medirse cos rivais e ver cómo andan de forma
Tamén andaba por Pontevedra Suso Morlán, adestrador persoal de David Cal, que estivo as pasadas semanas con el en Trasonas (Asturias), adestrando duro, para que estivese en forma para o Campionato do Mundo. Para Morlán o que importa é acabar entre os seis primeiros do mundo, e as medallas do Europeo son secundarias, xa que o seu pupilo chega ben cansado dos adestramentos.

Outro dos factores que se teñen en conta neste campionato, segundo dixo o palista galego, David cal, é a importancia de poder medirse con palistas de todo o continente, e poder comprobar o propio estado de forma.

Para outros palistas galegos, como Jovino González, este é un campionato moi importante, xa que se celebra na casa, e para el gañar algunha medalla sería a súa máxima aspiración, ademais de obter unha boa posición no Mundial.