Vieiros

Adán insta a Xosé Luís Baltar a reflexionar, e rectificar as declaracións en que comparou as coalicións de goberno entre BNG e PSOE con "matrimonios de conveniencia, que só van augurar violencia de xénero". Dende Igualdade considéranse moi desafortunadas estas frases por parte dun responsábel institucional, menos oportunas aínda no mesmo día en que se enterra en Cee a Lucía Canosa Senlle, a cuarta vítima mortal a causa da violencia de xénero en Galiza neste ano.

Como indica Carme Adán, "por palabras e actitudes deste tipo, que poñen de manifesto un uso frívolo dun problema tan serio como a violencia machista, hoxe en día temos en Galiza e en todos os países esta problemática estrutural tan complexa, da que nos resulta tan complicado saír". A secretaria xeral da Igualdade sinala que actitudes como a de Baltar dificultan aínda máis a loita contra a violencia de xénero.