Vieiros

O filólogo e historiador Jorge María Ribero Meneses, despois de investigar durante anos, chegou á conclusión de que os vascos foron os primeiros habitantes do continente europeo.

Segundo Ribero Meneses, ademais, o éuscaro de hoxe en día é a evolución do idioma máis vello do mundo, que no seu momento estaba xeneralizado en todo o norte da Península Ibérica.

Estas son algunhas das teorías que defende o autor e que recolle no libro A verdadeira orixe dos vascos: a primeira humanidade, presentado este xoves na biblioteca Koldo Mitxelena de Donostia, segundo informa a EiTB.

Orixe do independentismo vasco
"Cantabria e Euskadi sempre foron o mesmo, como demostran numerosos mapas e documentos da antigüidade, mais o teólogo e historiador Enrique Flórez, no século XVIII, teimou en deixar fóra aos vascos, defendendo a base de disparates que só os santanderinos eran cántabros", sinala Ribero Meneses.

Segundo o historiador e filólogo, "esa é a orixe do independentismo" vasco, xa que Flórez "creoulle un grave problema de identidade aos vascos".

O autor vén postulando dende 1984 a zona cantábrica como o lugar onde se desenvolveu a primeira humanidade intelixente.

Estudos de ADN publicados en 2003 apuntan neste senso. Estes aseguran que as tres cuartas partes dos europeos proveñen dunha poboación específica ao norte da península. En 2006, outro estudo xenético afirmaba que todos os habitantes das Illas Británicas eran orixinarios da costa cantábrica.