Vieiros

Desde a pasada semana delegacións de Arxentina e Uruguai reúnense en Nova York nunha serie de encontros de tipo fundamentalmente técnico nos cales se debate sobre a planta de Botnia, causa agora mesmo do conflito entre ambos gobernos.

De xeito paralelo, na Corte Internacional segue aberto o proceso contra o goberno uruguaio froito da denuncia do executivo arxentino, que acusa ao de Tabaré Vázquez de violar o tratado conxunto sobre a ribeira fronteiriza.

Ao tempo, esta semana o viceministro uruguaio de Medio Ambiente, Jaime Igorra, anunciou que entre finais de outubro e comezos de novembro, a factoría da finlandesa Botnia quedará lista para iniciar o seu funcionamento. Para daquela, está previsto que o operativo despregado no contorno se traslade á localidade a onde se mudou o proxecto de Ence, na procura de afrouxar as protestas.