Vieiros

Agoiroulle Anxo Quintana unha "derrota por goleada" ao PPdeG na cidade da Coruña, e chamou tamén aos cidadáns a retirarlle o apoio ao PSdeG onde na súa opinión o candidato socialista herdou similares "parámetros antigos" aos que no seu día "practicaba Francisco Vázquez". Cualificando de "caducas e ineficaces" as teorías da "cidade-Estado" do ex rexedor coruñés, Quintana pediu o voto para o BNG en favor "dunha política limpa e comprometida á vez con Galiza e coa Coruña".

Na súa intervención na cidade herculina destacou especialmente o debate sobre vivenda nesta campaña e dixo botar en falta compromisos concretos do PPdeG neste eido. "Feijoo o outro día perdeu o tren en Ourense e hoxe perdeu a oportunidade de asumir o compromiso en materia de vivenda proposto polo BNG", comentou. Ao fío, fixo brincadeira sobre a publicidade dos populares ao respecto da oferta de vivenda a "prezo taxado". Así, preguntouse Quintana: "taxada por quen? polos especuladores? polos promotores? polo mercado libre?".

A continuación, o candidato do BNG á alcaldía da Coruña, Henrique Tello, laiouse de que a cidade estivese dirixida durante tantos anos "por un equipo que priorizou as lambetadas ao pan e que investiu 18 millóns de euros nun ascensor que leva a ningures, antes de arranxar os problemas dos seus cidadáns". Tello solicitou o "voto masivo" para o Bloque para "gobernar á Coruña con sentido común".