Vieiros

"Nunca sacrificaremos os estaleiros da ría de Ferrol para defender aos de Cádiz", afirmou o voceiro nacional do BNG, ironizando coa situación creada en Navantia: "semella que a alternativa de emprego dalgúns para Ferrol é que a xente se empadroe en Andalucía". Na súa opinión, os proxectos dos rivais políticos para a cidade quedan desacreditados pola súa incapacidade para "estabelecer compromisos polo emprego" e a teima en deixar "destruír o maior xerador de emprego da cidade, a construción naval".

A continuación, o candidato do BNG á alcaldía, Xoán Xosé Pita, pediulle o voto aos asistentes para "non supeditar a acción política ás ordes do que digan en Madrid". "Chegou a hora de planificar unha cidade pensada para as persoas e non para a especulación", engadiu Pita, acusando o PPdeG de "planificar como vender os mellores predios da cidade sen contar coas necesidades de Ferrol".

O candidato nacionalista destacou tres eixos do seu programa: desenvolver parques empresariais e manter un estaleiro que "volva construír barcos civís"; conseguir unha cidade con elevada calidade de vida e liderar un goberno capaz de "colaborar" cos concellos de Ferrolterra.