Vieiros

"Había un alcalde que gañou as eleccións e que xa non está, e haberá que preguntarlle a Touriño quen o botou", comentou o presidente do PPdeG, Alberte Núñez Feijoo, durante o mitin do seu partido este martes na Coruña. Feijoo criticou que os socialistas xa non sigan principios dos que o ex alcalde da Coruña, Francisco Vázquez, era defensor como que "España é a única nación", que "os terroristas vaian ao cárcere" ou que "Galiza non sexa gobernada polo BNG".

Feijoo botou man do topónimo non oficial para subliñar que a metrópole herculina "xoga na liga das grandes cidades" e prometeu que o candidato do PPdeG, Carlos Negreira, sacará a cidade da "segunda división" onde na súa opinión "quérenos condenar a xogar o alcalde accidental", en referencia a Xavier Losada. Na súa intervención, Feijoo tamén fixo referencia aos "milleiros de cartas pedindo o voto da diáspora" que con cabeceiro do concello coruñés tería enviado Losada solicitando o apoio nos comicios do 27M.