Vieiros

Vieiros de meu Perfil


GZ-Sete

Edición xestionada por Vieiros
RSS de GZ-Sete
Denuncian a destrución do espazo natural

O goberno de Ferrol aproba a urbanización da fraga de Menáncaro

Consideran que é un atentado ecolóxico e un delito de prevaricación, por estar implicado o tenente de alcalde na operación.

Redacción - 13:47 20/04/2007

O Concello de Ferrol aprobou o venres á mañá o proxecto de urbanización da Fraga de Menáncaro, cos únicos votos do goberno local, formado polo Partido Popular e Independentes por Ferrol. O resto dos grupos políticos saíu do pleno cando se lle impediu asistir á sesión a un grupo de veciños.

O xoves, os membros da Comunidade Menáncaro e mais as organizacións ecoloxistas Adega, SGHN e Verdegaia acordaron condenar o previsíbel acordo plenario por consideralo un atentado ecolóxico e un delito penal por prevaricación.

Os veciños critican, entre outros aspectos, o feito de que o tenente de alcalde do Concello, Juan Fernández, sexa o principal promotor da urbanización do contorno natural. Por este motivo, o líder de Independentes por Ferrol non participou na votación do pleno, por estar directamente implicado na operación.

A comunidade demanda que se estabeleza unha figura de protección total para a fraga de Menáncaro, polo seu interese natural, científico, cultural e paisaxístico. A entidade veciñal anunciou que contactará coa Xunta, cos xulgados, coa fiscalía de Medio Ambiente e cos grupos da oposición municipal para tentar revogar o proxecto de urbanización da zona. A comunidade reunirase de novo o luns 23 no Ateneo Ferrolán.

A Sociedade Galega de Historia Natural e Adega fixeron este vídeo sobre a fraga:


4,27/5 (11 votos)

Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí: