Vieiros

Grazas á presión internacional, algunhas das empresas que se abastecían nesta fábrica puxeron en marcha un fondo con este fin. A fábrica producía para grandes multinacionais europeas: a española Zara, a alemá Karstadt Quelle a sueca New Wave Group, a holandesa Scapino e a francesa Solo Invest xa se comprometeron a contribuír. Mentres, a francesa Carrefour, a belga Cotton Group e as alemás New Yorker, Steilman, Kirsten Mode e Bluhmod rexeitan participaren no fondo.

Xa o verán pasado, Inditex distribuíu ás empresas clientes de Spectrum unha proposta de “fondo voluntario de asistencia” para as vítimas, valorado en 533.000 €, que dese para pagarlles pensións mensuais as persoas que quedaron impedidas e ás familias das que morreron na fábrica. A xestión deste fondo corre a cargo das organizacións locais: Oxfam Gran Bretaña en Bangladesh, a oenegué bengalí Incydin e a representantes de sindicatos locais.

Dende o derrubamento, o 11 de Abril de 2005, moitas familias quedaran nunha situación de extrema pobreza. A campaña Roupa Limpa, coordinada en España por Setem, insistiu para que estas familias fosen indemnizadas, e agora segue a esixir a Carrefour e ás outras empresas que se negan a participar no fondo que acheguen a súa contribución como as demais. “Como todas as multinacionais clientes de Spectrum, estas empresas se veñen beneficiando dos baixos salarios, ausencia de cobertura social e precariedade, pechando os ollos ante as pésimas condicións de traballo. Contribuíndo ao fondo de compensación e colaborando sobre do terreo coas oenegués e sindicatos locais implicados nesta iniciativa, estas empresas teñen a ocasión de amosar que realmente se toman en serio a súa responsabilidade social.