Vieiros

Azemeraw Zeleke é un mecánico de 54 anos da vila de Mekele no norte de Etiopía. A distribución de pezas de reposto para máquinas de café na rexión de Tigray é o seu negocio, mais o que o fai diferente é o tipo de materiais cos que traballa.

Segundo informa a axencia de noticias Reuters, Zeleke utiliza os restos das armas empregadas na guerra entre Etiopía e Eritrea (1998-2000) como materia prima para os repostos das cafeteiras.

"Os granxeiros tráenme os cascos dos morteiros do antigo campo de batalla", sinala, e engade: "Os tubos baleiros son perfectos para as máquinas de café. O bronce non se enferruxa, e a forma que teñen é ideal".

"Da guerra ao pracer"
Zeleke e mais a media ducia de traballadores cos que conta precisan dunha semana para converter os morteiros usados en cuncas para almacenar o café na máquina. "Collemos esas ferramentas de guerra e convertémolas en ferramentas de pracer", comenta o seu fillo Mehany, de 22 anos. "Pode que sexa unha mensaxe para o mundo", engade.

Os habitantes da zona recollen os morteiros da liña fronteiriza, onde o 70.000 foron asasinadas durante o conflito. Zeleke e os seus pagan ao redor de 350 birr (30 euros) por cada un. Despois venden as máquinas de café -unha media de seis ao ano- por uns 10.000 birr (preto de 900 euros).