Vieiros

Nesta mostra poderemos ver corenta e cinco lenzos nunca expostos até agora, que pertencían á colección da familia Alcalde Varela. Comisariada por Rosa Espiñeira Pan, experta na obra de Seoane, a exposición percorre toda a traxectoria artística do pintor e poeta, dende o impresionante cuadríptico A Costa de Circe, tempestuoso e barroco (1948), até os traballos máis vangardistas de trinta anos despois.

Sen abandonar nunca a arte figurativa, os trazos son cada vez máis lixeiros, as cores, máis básicas. A estética do cartel e da arte popular non o deixou nunca. Con todo, afirmaba: "Eu non fixen pintura "pop", aínda adiantándome a ela en moitas cousas, porque o "pop" é unha cousa diferente; interveñen nel outros elementos e unha temática moi particular que non hai na miña obra, pero desde logo síntome moito máis cerca cun "pop" que dun expresionista". Sintetizador e idealizador da paisaxe, da identidade, sempre cun aquel de morriña nas imaxes: "son e serei para sempre un desarraigado permanente, sereino, aínda cando agora decida volverme ao meu país. É o destino do exiliado".