Vieiros

Segundo un informe do Centro Michael D. Palm, nos últimos tres anos arredor de cen mil ex-delincuentes uníronse ao exército estadounidense. A institución está a admitir excepcionalmente aspirantes a soldado con antecedentes penais, problemas médicos ou baixo cociente intelectual que noutros casos quedarían fóra das Forzas Armadas. En concreto, inclúense exencións por narcotráfico, delitos graves e faltas menores.

O estudo determina que a entrada de infractores no Exército aumentou dende o ano 2003, pasando de 411 novos recrutas naquel ano até os 901 no 2006. En canto a persoas con delitos menores, como roubo, agresión física ou uso de cheques sen fondo, pasaron de 2.700 hai catro anos a 6.000 en 2006.

Funcionarios do exército e do Pentágono defenderon estas exoneracións. Afirmaron que é un xeito de admitiren xente nova que cometeu delitos pero que agora está reformada. Ora ben, os lexisladores están preocupados porque a admisión de persoas con antecedentes penais pode influír negativamente nos estándares morais das forzas de combate.