Vieiros

O parto para o decreto de galeguización non está a ser nada fácil. A Consellería de Educación decidiu variar a semana pasada a súa proposta inicial. Se nun primeiro momento se falaba dunha porcentaxe de materias na nosa lingua que oscilaría entre o 56 e o 68%, o novo borrador reduce estas cifras para achegarse aos mínimos do Plan de Normalización aprobado en 2004. De levarse adiante, as materias impartidas na nosa lingua quedarían fixadas nun 50%.

Aínda que nun primeiro momento se falou de que o novo decreto ía favorecer a aprendizaxe da lectoescrita en galego, agora a Consellería de Educación recúa. A última proposta apenas variaría o status actual da lingua na Eduación Primaria. Pola contra, no ensino Secundario e no Bacharelato estaría garantido un 50% das materias, aínda que habería moitas cambadelas para superar esa porcentaxe.

A nova postura da consellaría está a provocar un fondo malestar nas filas nacionalistas. Dende o BNG estaban dispostos a apoiar a primeira proposta, que contemplaba que as materias impartidas en galego oscilasen entre o 56 e o 68%, aínda que coidaban que podía ser máis ambiciosa. O acordo semella agora moito máis difícil. O Bloque considera que o texto proposto por Educación non supón avance cualitativo algún con respecto ao decreto vixente, que data xa do ano 1995.

Medran as diverxencias
As posturas nos partidos son moi diverxentes. Mentres os PSdeG fala de que o novo texto representa un avance cara o "multilingüismo", o BNG lembra que os propios inspectores detectaron incumprimentos do anterior decreto en 120 centros públicos. Pola súa banda, o PPdeG cre que se se ultrapasan os mínimos do Plano de Normalización de 2004 estaríanse a vulnerar os dereitos dunha parte do alumnado.

Unha boa mostra das discrepancias son os prazos previstos inicialmente. Socialistas e nacionalistas pretendían publicar o decreto, a máis tardar, no mes de marzo. Con isto querían dar a coñecer a nova normativa entre a comunidade educativa de cara o vindeiro curso. Fontes consultadas por este xornal coidan que o decreto, en caso de haber acordo, non vai estar publicado antes do mes de maio.