Vieiros

A axencia espacial norteamericana, NASA, anunciou este xoves que a exploración da superficie de Marte confirma a existencia de auga líquida no planeta. Os datos enviados pola sonda Mars Global Surveyor reflicten a existencia da substancia sobre a superficie do planeta. "Xa tíñamos probas de que houbo auga hai millóns de anos, agora atopamos probas da súa presenza na actualidade", asegurou o experto Kennet Edgett. O anuncio obtense logo do estudo de fotografías de alta resolución de gabias en outeiros de cráteres no hemisferio sur de Marte. No 2004 xa se realizara un anuncio semellante, aínda que non tan contundente, logo de que o vehículo explorador Opportunity atopase probas da existencia de humidade en varias rocas.