Vieiros

Vieiros de meu Perfil


Edición xeral

RSS de Edición xeral
SÓ UN 6% DOS INCENDIOS DO VERÁN SE DEBERON A CAUSAS NATURAIS

O goberno español recoñece indicios de grupos organizados para plantarlle lume aos montes

Os testemuños sobre a aparición de individuos en motos e coa cara cuberta por máscaras en diversos montes galegos, a detección de trebellos incendiarios na orixe de importantes lumes, a especial combinación temporal e xeográfica de focos nalgunhas zonas ou episodios coma o dos lumes a pé dos aeroportos, son exemplo de que a actividade criminal é algo máis que unha suma de incendios aleatorios. O executivo español acaba de recoñecer que liñas de investigación como a dos motoristas incendiarios son seguidas estreitamente, ao tempo que avalía que só un 6% de lumes foron debidos a causas naturais e apenas un 11% a imprudencias.

- 12:54 10/11/2006
Tags:

O goberno español evitou afondar na explicación dos casos concretos de incendios provocados durante o pasado mes de agosto por individuos equipados con motos e enmascarados, argumentando que "non ocorreron en demarcacións da Garda Civil". Con todo, o executivo recoñece non só ter constancia deses casos, senón tamén que hai investigacións abertas para a identificación deses presuntos incendiarios.

En resposta a pregunta do voceiro do BNG no Congreso, Francisco Rodríguez, o goberno español debulla os informes achegados desde a Garda Civil e indica que só un 6,2% dos lumes foron debidos a causas naturais ou accidentais e que un 11% se lle atribúen a imprudencias ou neglixencias. Do resto, dun 26% sublíñase a existencia de probas da súa intencionalidade, mentres que o 56% restante permanece de momento na categoría de "orixe descoñecida".

A concentración de incendios nunha mesma zona, con varios focos diferentes; o abrollo dos lumes en zonas de acceso complicado para os servizos de extinción; a aparición sucesiva de lumes nun curto período de tempo e seguindo a liña dunha mesma estrada ou unha mesma pista forestal... Os investigadores manexan pegadas claras de que a actividade criminal nos montes galegos é máis que a casual coincidencia no tempo da actividade de incendiarios descoordinados. O executivo avanzou que están en proceso investigacións sobre o presunto vencello dalgúns dos detidos a outras persoas que ben pagan estes actos delituosos ou incitan a eles.

Na memoria están casos especialmente significativos, como a detención a mediados do pasado agosto nunha pista forestal de Ourense dun incendiario que resultou ser membro dun equipo de extinción. Ao individuo atopáronlle no coche un garrafón de combustíbel, máis dunha ducia de chisqueiros e outro material co que presuntamente armaba artefactos incendiarios. Na mesma xornada, varios veciños trataran de atrapar preto de Ribeira a un grupo de persoas vestidas con roupas de camuflaxe que lle prenderan lume a un monte da zona.


0/5 (0 votos)


Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí: