Vieiros

"Esta dirección xeral nunca vai permitir que se xogue cos cartos dos clubs de base deste país". Deste xeito Santiago Domínguez amosaba este martes en rolda de prensa a súa preocupación ante as posíbeis irregularidades nas contas da Federación Galega de Fútbol.

O máximo dirixente do deporte galego xa anunciou que será o Comité Galego de Xustiza Deportiva o encargado de analizar o suposto desbaldo nas contas da federación. Domínguez afirmou que foi o pasado venres cando recibiu a Plácido Díaz, presidente da Asociación de Clubs Galegos de Fútbol, quen "presentou ante a dirección xeral unha documentación da que se desprende que podería haber indicios de irregularidades, o que suporía incorrer nunha infracción moi grave debido á incorrecta utilización dos cartos públicos". Ao mesmo tempo lembrou que é obriga do seu departamento velar para que as subvencións se empreguen axeitadamente.

Será o Comité Galego de Xustiza Deportiva o encargado de analizar os documentos presentados, "órgano encargado de abrir expediente para dilucidar se se está incorrendo en falta moi grave". De ser así, a dirección xeral podería chegar a suspender de forma provisional o presidente da federación ou a aquelas persoas que tivesen incorrido na falta.

Domínguez subliñou que "esta dirección xeral nunca vai consentir que se xogue cos cartos dos clubs de base deste país, porque todos sabemos o esforzo e o sacrificio que son necesarios para recadar os cartos co que pagan as súas licenzas ás federacións". Por iso, o director xeral insistiu en que o deber da Administración é actuar conforme á lei e "non permitir que estas condutas teñan lugar no noso deporte, porque están en xogo os cartos dos nosos clubs".

Á espera de que o comité se pronuncie sobre o caso, a dirección xeral paralizará de momento as subvencións que a federación recibe deste órgano e, ao mesmo tempo, xa se anunciou unha xuntanza entre Domínguez e o presidente da federación para mañá ás 13.30 horas.