Vieiros

Os campionatos de ciclismo de montaña que se desenvolveron ata esta fin de semana en Nova Celandia ofreceron un pobrísimo resultado para España. Ningún dos seus seleccionados estivo en condicións de desputar postos de honra en categoría masculina. En mulleres, a única española en Rotuora, a balear Margarita Fullana, foi quinta en fondo de montaña, algo lonxe do ouro da norueguesa Dahle Flesjaa.

Pero a selección masculina, que levaba ciclistas en todas as especialidades, foi un desastre. Despois da prohibición de competir que lle sinalaron a Xosé Antonio Hermida por estar supostamente relacionado coa operación antidopaxe Puerto, o primeiro español en fondo de montaña foi Martí Gispert (15º), mentres que Carlos Coloma foi 33º. En descenso, David Vázquez foi 15º mentres que Óscar Sáiz Castañe ocupou a posición 22º. Aínda peor resultado colleitou o respresentante española en fourcross masculino, o andaluz Rafael Álvarez de Lara, que quedou eliminado na primeira rolda, e finalizou 34º.

Eva Castro loitaría polas medallas... se a levasen

Eva Castro, a especialista oleirense en fourcross (descenso en quendas de catro), non fora seleccionada pola Federación Española e quedou en terra. O motivo para non facelo foi que había outros ciclistas con maiores posibilidades de medalla e que mandar tanta xente resultaba moi custoso. Pero á vista dos resultados do combinado español, esa decisión non parece sosterse.

Ao máis alto do podio subiu a estadounidense Jill Kintner, seguida pola neerlandesa Anneke Beerten e a austríaca Anita Molcik. Nos campionatos de Europa Eva Castro conseguira o bronce por detrás da neerlandesa e da austríaca, nunha proba onde a distancia entre a oleirense a Molcik fora moi exigua. É dicir, Castro estaría en condicións de pelexar por ese bronce da austríaca.

Protestas do Concello de Oleiros

O concelleiro de Deportes de Oleiros, o nacionalista Antón Tenreiro, sinalou o seleccionador español, Mikel Zabala, da "teimuda decisión de deixar na casa a medallista europea", mais tamén lle pediu á federación galega que presente "unha protesta formal á federación española".