Vieiros

A delegación galega nesta edición dos Xogos Náuticos Intercélticos caracterízase pola súa baixa media de idade, tratándose na maior parte dos casos de deportistas de categorías infantil e xuvenil tanto da modalidade masculina coma da feminina.

Case 600 deportistas participarán nesta semana de competición e intercambio. Entre os participantes desta undécima edición atópanse Irlanda, Gales, Cornualles, Bretaña, Euscadi, Cataluña, Asturias, Bélxica, Países do Loira, que asisten a estes xogos que teñen, amais do seu carácter deportivo, tamén un fin cultural e económico.

A semana deportiva vai acompañada dun importante programa cultural que supón a posta en común das distintas rexións celtas e das rexións do Espazo Atlántico Europeo con orixes comúns. Por iso, os Xogos Náuticos Intercélticos teñen a ambición de ilustrar e de promover a competencia náutica particular dos distintos participantes favorecendo, tamén, a emerxencia de novos intercambios entre as nosas poboacións.