Vieiros

Jaime Comesaña, director de Aviation Handling, empresa encargada da xestión dos voos privados de Peinador, asegurou que o suposto voo da CIA que fixo escala no aeroporto vigués o pasado 31 de agosto pasou "todos os controis" de seguridade. Segundo Comesaña, ao tratarse dun voo non europeo están na obriga de avisar da súa chegada á Policía Nacional e á Garda Civil, os cales inspeccionaron "a fondo" o aparato.

Segundo o responsábel de Aviation Handling, os dous homes que viaxaban a bordo parecían "empresarios normais" e aclarou que os traballadores da súa empresa só falaron cos membros da tripulación. Os pasaxeiros pasaron a noite no Hotel NH Palacio de Vigo, o que contradí as primeiras informacións que apuntaban a que tiñan pasado a noite dentro do avión.

Comesaña asegurou que non é "nada estraño" que este tipo de avións realicen escalas técnicas no aeroporto de Vigo, porque é un "punto estratéxico" nas rutas de voo.

Amnistía Internacional denuncia a complicidade de varios estados europeos
Pola súa parte, Amnistía Internacional vén facer públicos varios informes en relación aos supostos voos segredos da CIA. Nestes informes denúnciase a complicidade de sete estados europeos, catro deles membros da UE co programa estadounidense de "entregas extraordinarias".

A "entrega extraordinaria" é unha práctica ilícita pola cal se detén ilegalmente a unha persoa e se leva, vía aérea en segredo, a un terceiro país no que é vítima de outros delitos, como tortura, malos tratos e "desaparición".

Amnistía Internacional está nestes momentos a investigar se o voo que fixo escala en Vigo ten relación algunha con este programa de entregas. Porén, responsábeis galegos da oenegué, destacan o caso recollido no informe sobre dous cidadáns residentes no Reino Unido que, tras viaxar a Gambia (destino do voo que pasou por Vigo) en 2002, foron secuestrados polos servizos secretos dese país, entregados os estadounidenses e remataron en Guantánamo tras pasar por Afganistán.