Vieiros

"A epidemia a nivel internacional está crecendo a un ritmo máis lento do que o facía nos anos 90", asegurou o epidemiólogo da ONU Peter Ghys, durante a presentación do informe sobre a evolución da sida no 2005. O estudio lembra que o África subsahariana segue a ser a rexión máis afectada do mundo. Así, as dúas terceiras partes de todas as persoas afectadas polo VIH viven no África subsahariana, máis de 24 millóns durante o 2005.

Mentres a epidemia en Sudáfrica non deu mostras de reducirse, outros países africanos si lograron reducir a incidencia do virus na súa poboación. O número de infectados diminuíu en Kenia e Zimbabwe, así como en áreas urbanas de Burkina Faso. O informe destaca tamén un redución dos casos en Camboia e Tailandia, pero creceu en China, Indonesia e Vietnam. No 2005 India superou a Sudáfrica como o país máis afectado pola enfermidade en termos absolutos de persoas.

En España, 140.000 persoas viviron co virus no 2005. O informe da ONU sinala que a introdución de programas de tratamento con metadona e de intercambio de agullas durante os anos 90 reduciu notabelmente o número de infeccións entre os consumidores de drogas.