Vieiros

"E a min que me importa?", así resolveu Francisco Cacharro Pardo este luns as alusións ao vencello que tiñan entre si os diferentes candidatos ás adxudicacións de obras do departamento de Vías e Obras que son analizadas pola fiscalía. Lembrámoslles que na práctica, esas persoas estaban vencelladas todas elas á mesma empresa.

Indicou Cacharro: "iso ténme sen coidado porque nunca tiveron relación profesional ou laboral coa deputación". O presidente da deputación afirmou isto rexeitando valorar o vencello familiar entre os funcionarios de Vías e Obras e as empresas adxudicatarias. Ao tempo, insinuou que diferentes persoas puideron ser "espíadas" durante esta investigación, aínda que evitou dar máis datos sobre a acusación desa presunta vixilancia ilegal.

Por outro lado, o vicepresidente do PPdeG e malia continuar negando que o PP teña calquera vencello con este proceso xudicial, insistiu en ver a presunta man do PSdeG co obxetivo de "usar electoralmente" a situación. Barreiro dixo agardar que o proceso avance rápido e se resolva antes de que aos lugueses lles toque ir ás urnas en 2007. Mentres, o presidente dos populares galegos, Alberte Núñez Feijoo, insistía en facerse eco da suposta reunión do secretario de organización do PSOE, Xosé Blanco, co fiscal do caso, Jesús Izaguirre, información xa desmentida polo PSOE, ao tempo que criticaba actuacións anteriores do mesmo fiscal e o acusaba de "escesos escénicos". Con todo, indicaba que o PPdeG "non vai amparar irregularidades" e que do que diga a xustiza se derivará que "haxa responsabilidades políticas ou non". Desde o PSOE repróchanlle aos populares que utilicen un falso ruxerruxe desa xuntanza, atribuído a un blogueiro coruñés relacionado co PP, para desviar a opinión neste momento.