Vieiros

Baixo o lema "Estabilidade Xa, Non aos despidos de profesorado interino" uns vinte docentes iniciaron ás 11 horas un encerro permanente e indefinido no Instituto Rosalía de Castro de Santiago. A medida, que foi convocada na recente asemblea da Plataforma en defensa da estabilidade do profesorado interino e substituto, ten como obxectivo acadar un acordo de estabilidade coa Consellaría de Educación.

Segundo Anxo Louzao, de Cig-Ensino, o colectivo "non está disposto a asumir unha proposta que non recolla ningún compromiso de estabilidade", porén valorou positivamente algunha das outras medidas incluídas na última Mesa Sectorial. O xoves está prevista unha nova xuntanza na que, segundo Xoán Valiño, representante do Sindicato de Traballadores Galegos do Ensino, agárdase que Educación leve "algo convincente" para poder negociar.

Pola súa parte, o Partido Popular acusou a Educación de "ignorar" a recente folga de 5.000 profesores interinos. Os populares galegos presentaron no Parlamento unha iniciativa na que instan a Educación a habilitar "prazas suficientes" e facilidades no acceso dos interinos. O PP galego tamén reclama que se melloren as condicións laborais e salariais do sector, coa aplicación de trienios e sexenios, así como a percepción total dos salarios a partir dun determinado número de meses e anos traballados. e das retribucións, así como o acceso á formación como profesorado.