Vieiros

Nesta ocasión a flota comezou con máis sorte en vista dun vento do nordés duns quince nós. As dornas tomaron a saída ás 12:20 da maña parra facer un largo percorrido desde Coroso ata a primeira marca nas Illas Airoas, a segunda na Illa de Rúa e a terceira nas Lobeiras de Terra.

Controlou a saída a Papoula de Carlos Otero e Jorge Ramos con maña polo furado de barlovento, seguido da Vikinga de Fernando Redondo e a Ardentía de José María Franco e Benito López. Seguiu ó pelotón de cabeza tamén moi ben sita a barlovento a Lusiña de Antonio Santiago e José Ángel García deixando na loita tiradas a varias embarcacións de sotavento. A Papoula conseguiu aire limpo no largo navegando moi directo á liña da segunda marca para logo voltar á primeira posición de barlovento na entrada ás Airoas.

A Jolfiña de Alberto Romero e Nacho Jorganes presionou moi de preto a popa da Ardentía e conseguiu pasala a sotavento antes da entrada ás Airoas onde as dornas se encontraron con ventos máis frouxos de proa. Esto fixo que as dornas do pelotón se abriran a sotavento seguindo a estela da Papoula. A Jolfiña aproveitou a ocasión para roubar barlovento e saír das Airoas cunha mellor ceñida cas outras embarcacións. A única dorna que seguiu a ceñida da Jolfiña foi a Sandra de José Antonio Castrelo e José Manuel Santiago –a dorna gañadora da primeira proba da competición—pero encontrouse cunha boia e un cabo submerxido que lle arrincou o temón saíndo das Airoas. Esto permitiu que a Jolfiña collera vantaxe a barlovento sen presión das demais dornas.

A primeira en atacar antes da segunda marca foi a Volandeira de José Gago que navegando só optou por virar para terra nun intento de mellorar a súa posición na regata. Estou causou que outras embarcacións, entre elas a Ardentía e a Sandra, tamén optaran pola virada de terra. A Jolfiña aguantou a virada da fóra ata que todas as dornas viraran para terra pero encontrouse cunha sorprendente ceñida da Papoula que se puxo ó costado dela preto de Rúa. Asemade a Ardentía e a Sandra recuperarán moito camiño vindo desde terra sen sufrir o abrigo de Rúa. A Papoula presionou á flota amagando un intento pola pasantía da Caraveliña que nas condicións reinantes con marea baixa e vento de proa facíase un tanto perigosa. A Jolfiña arriscou a pasantía e tocou temón nos conles da Caraveliña pero recuperou sen perder goberno. Mentres a Papoula virou por fóra de Rúa para non arriscar na pasantía. As demais dornas tamén viraron por fóra da pasantía o que lle dou á Jolfiña unha vantaxe superior cara a terceira marca.

Nas Lobeiras as dornas encontráronse cun vento de popa que remitía ata que se quedaba practicamente na calma podre. A Papoula, débil en pouco vento, sucumbiu ante á Sandra que fixo camiño lentísimo ata a liña. De feito tanto a Jolfiña como a Sandra tardaron máis dunha hora en realizar o percorrido na última manga. Ante a encalmada as dornas empezaron a renderse unha tras outra chegando á meta tan só a Jolfiña e a Sandra. A Papoula foi a última en abandonar a tan só 200 metros da liña deixando dese xeito un terceiro posto que xa conseguira na primeira proba de inverno. A decisión da Papoula foi fatídica ante as circunstancias xa que con dous terceiros postos consecutivos case aseguraba trofeo no Campionato. Ningunha outra dorna puntuou na proba. A saída da próxima regata do Campionato de Inverno vai ter lugar o sábado, 18 de febreiro ás 16:00 horas.

A clasificación xeral despois da segunda proba de cinco que compoñen o Campionato é a seguinte: 1ª Jolfiña, 2ª Sandra, 3ª Papoula, 4ª Lusiña, 5ª Vikinga, 6ª Ardentía, 7ª Áncora, 8ª Jeles, 9ª Adoa, 10ª Moura, 11ª María da Fonte, 12ª Xarda, 13ª Zoa.