Vieiros

Na defensa da proposición non de lei, o deputado do BNG Xosé Domingo Oreiro valorou a proposta do Bloque, así como a protección das linguas minorizadas sen que iso supoña menoscabo para o castelán. O deputado do PNV Aitor Esteban defendeu que o informe dá unhas pautas interesantes para as administracións e aludiu ás deficiencias destas na defensa das linguas minorizadas, especialmente en educación e xustiza. O socialista pontevedrés Domingos Tabuyo sinalou que a Carta abarca un amplo espectro de actuacións para potenciar esa linguas e contén unha serie de compromisos, "aos que o Goberno lles concede grande importancia e que asumimos". Na súa opinión, o nivel de protección e defensa é "elevado" e insistiu no compromiso do Estado para potenciar o seu uso e aplicación.

A Carta Europea das Linguas Minorizadas é un tratado internacional que pretende garantir o pleno desenvolvemento das linguas non estatais no continente. Asinada polo estado español, durante os anos de goberno Aznar non se realizou un cumprimento correcto dos seus ditames, conforme sinalou reiteradamente o Comité de Expertos que se encarga do seu seguimento. A última destas ocasións foi hai só uns meses, nun documento onde se solicitaba explicitamente a implantación en Galiza dun sistema educativo de inmersión en galego.