Vieiros

Incendios en caixeiros, destrozo de mobiliario urbano, pintadas ou queima de bandeiras, serían algúns dos delictos concretos polos que os xulgados poderían continuar a causa aberta contra os independentistas detidos esta semana en varias cidades galegas. A fiscalía recoñeceu este mércores a imposibilidade de abriren contra eles causa por delicto de terrorismo, e ao tempo que eran postos en liberdade sen sequera a toma de medidas cautelares, é probábel que finalmente o fiscal lle pida á Audiencia Nacional que traslade o caso aos xulgados galegos.

Dende o Movemento polos Dereitos Civís subliñan especialmente que se promovese unha "actuación absolutamente desproporcionada realizada pola Garda Civil", propiciando ademais que os detidos fosen vencellados co terrorismo "cando perante a Audiencia Nacional non se presentou ningunha denuncia relacionada con eses delitos". Segundo o colectivo, ese proceder só contribuíu a crear "un ambiente de alarma social en Galiza sin precedentes e a criminalización de persoas e colectivos sen ningunha fundamentación xurídica". Ao fío láianse incluso de que a algún dos detidos a súa implicación neste proceso lle causase a perda do posto de traballo.