Vieiros

Os editores mostraron o seu "profundo malestar" por non seren consultados nin información sobre esta nova medida e propoñen ao goberno galego a creación con carácter urxente dunha "Mesa técnica sobre a gratuidade", constituída por representantes do sector do libro e da administración e "consensuar un modelo que faga posíbel a implantación da medida, ao tempo que non impida a mellora da calidade dos manuais escolares e favoreza o aumento dos índices de lectura e edición na nosa lingua".

Para Miguel Anxo Fernán Vello, presidente da AGE, "a impresión que produciu no sector do libro o anuncio da ampliación da gratuidade para os libros de texto foi un efecto de choque". Pola súa parte, Bragado engadiu que a medida, nos termos na que foi comunicada, demostra "un escaso coñecemento do sector do libro galego". Os editores consideran que a modalidade de préstamo "prexudica severamente as librarías galegas e condena ao conxunto do sector editorial a unha crise de viabilidade irreversíbel". Aseguran tamén que esta medida "levará á reconversión ás empresas editoras" e "ten un carácter negativo desde o punto de vista pedagóxico e escasamente redistributivo desde o punto de vista social, xa que suporá que unha importante parte dos fondos para a compra de libros se destinará a atender gastos de tarefas impropias da función educativa, como manter e xestionar almacéns de libros".

Por último, os editores propoñen ao goberno galego que leve a cabo "unha reflexión sobre as consecuencias que conlevaría a aprobación precipitada da medida no Consello da Xunta do día 8 de setembro" e reclámanlle ao presidente da Xunta que se reúna "de forma inmediata" cos representantes do sector do libro afectados.