Vieiros

O xornalista marroquí Ali Lmrabet foi elixido como gañador da primeira edición do Premio José Couso de Liberdade de Prensa convocado polo Colexio Profesional de Xornalistas de Galiza e o Club de Prensa de Ferrol. Lmrabet recibiu a maioría dos votos emitidos por correo electrónico e convencional polos xornalistas colexiados no CPXG e os socios do Club de Prensa ferrolán. Foran tamén propostos como candidatos ao premio Ignacio Ramonet, Juan José Millás, os servizos informativos da Cadena Ser e Ángel Arnedo, director de El Correo Español-El Pueblo Vasco, entre outros. O obxectivo do premio é "recoñecer e difundir o traballo dunha persoa viva ou organización existente destacada na defensa da liberdade de prensa ou cunha salientable traxectoria profesional, libre e independente".