Vieiros

O proxecto Hai que botalos! presentouse a través da Rede de Acción Cultural Arredemo e, segundo os propios promotores, "pretende amosar unha visión crítica da situación real na que se atopa Galiza". Unha situación da que en Hai que botalos! se denunciará a precariedade laboral, a degradación ambiental, o caciquismo ou a necesidade de emigrar.

Unha das principais características deste proxecto é que nel participan arredor dun cento de profesionais do mundo audiovisual e literario galego: actores e actrices, realizadores, productoras, escritores e escritoras, músicos, etc. Todos estes profesionais ademais ofrecen o seu traballo de xeito voluntario e a eles súmase a colaboración desinteresada de particulares e empresas.

A distribución deste traballo realizarase a través de canles non comerciais e contando con locais inscritos en Arredemo, ademais teñen prevista a publicación do traballo en DVD e o seu anuncio durante a Berlinale que acaba de comezar e na que participarán Miguel de Lira e Mónica García.

Así mesmo, a través de Arredemo poden ofrecer o seu traballo, as súas ideas, etc. todas aquelas persoas que queiran incorporarse ao proxecto.