Vieiros

O secretario xeral do PPdeG, Xesús Palmou, anunciou esta mañá que "non é necesario que tome ningunha decisión" porque se sente "respaldado polo partido". Palmou mostrouse disposto "a seguir traballando no PP e na Xunta" e asegurou que tras a reunión que mantivo onte Fraga con Mariano Rajoy "quedou totalmente resolto o problema que se formulara no partido". A súa dignidade, que onte invocou para xustificar a súa proposta de demisión, xa non está daquela en perigo. O conselleiro de Xustiza fixo estas declaracións tras unha xuntanza co presidente da Xunta esta mañá en San Caetano. Esta tarde reúnese o Comité Executivo do PPdeG onde se confirmará a Palmou como secretario xeral. Ao remate da xuntanza está prevista unha rolda de prensa de Fraga e o propio Palmou.