Vieiros

Vieiros de meu Perfil


Edición xeral

RSS de Edición xeral
XORNADAS DO SEMINARIO DE ESTUDOS GALEGOS

Os salarios en Galiza perden poder adquisitivo

Esta é unha das conclusións do seminario organizado pola Área de Economía do Seminario de Estudos Galegos e celebrado en Santiago de Compostela. A xornada estivo centrada no estudo da desigual incidencia da evolución dos prezos, do IVE e do custo da vivenda sobre a evolución da capacidade de consumo das familias en función do seu nivel de renda.

- 16:23 18/06/2004
Tags:

Presentáronse catro ponencias que abordaron con detalle estes diferentes aspectos. Xavier Vence, Catedrático de economía aplicada da USC, coordenador da xornada, presentou o estudo realizado sobre "IPC, negociación colectiva e deterioro da capacidade adquisitiva dos salarios", poñendo en evidencia que os prezos están aumentando a maior ritmo naqueles productos que teñen unha maior importancia relativa na cesta da compra dos fogares de ingresos modestos, en particular en alimentos, bebidas, roupa e calzado. Mostrou a consecuencia penalizadora de utilizar o IPC xeral para actualizar as pensións e para a negociación salarial, que se traduce na práctica nunha reducción continuada do poder adquisitivo desas rendas baixas. Tamén criticou a configuración actual do IPC por non tomar en consideración a evolución dos prezos da adquisición de vivenda, que está experimentando desde 1996 até hoxe incrementos seis veces superiores ao IPC. Defendeu a necesidade de redefinir o IPC e de introducir criterios complementarios na negociación colectiva.

Alfredo Serrano, profesor de economía da Universitat Autónoma de Barcelona, presentou a sua ponencia sobre "O IVE: impacto redistributivo e desigualdades", onde mostrou que a estrutura de tipos impositivos que se aplican aos diferentes productos teñen unha incidencia negativa sobre as desigualdades e penalizan particularmente o consumo dos segmentos máis pobres da poboación. Defendeu unha modificación da estructura do IVE, incorporando un tipo 0 para alimentos básicos e medicamentos, inspirandose no modelo de Canadá, que tería un efecto moi positivo sobre redistribución da renda.

O arquitecto-urbanista Josep Roca (Director do Centre de Política de Sol i Valoracions e catedrático da U. Politécnica de Barcelona) presentou o seu informe sobre "Os prezos da vivenda: factores explicativos e tendencias previsibeis", poñendo de relevo que os aumentos dos prezos da vivenda nos últimos anos debense sobre todo á presión da demanda da poboación xoven do "baby boom", a menor rendabilidade de investimentos diferentes ao da vivenda e, sobre todo, a ausencia dunha oferta pública de vivenda en condicións minimamente xenerosas. De cara ao futuro considera que os prezos da vivenda poden moderarse porque diminúa a presión a demanda e porque a capacidade adquisitva de boa parte dos futuros demandantes –fundamentalmente inmigrantes- vai ser reducida. Defendeu, ademáis, a necesidade de políticas de vivendas públicas en aluguer seguindo políticas homologables ás implementadas noutros paises europeos, poñendo como exemplo Holanda, onde o 40% do mercado de aluguer está constituido por vivendas públicas con alugueres subvencionados.

Anxela Troitiño, Xulia Guntín e Carmela Sánchez, Profesoras de estatística e econometría USC, presentaron un ponencia sobre "As desigualdades de renda e de salarios: tendencias recentes", na que mostraron a crecente distancia entre os salarios medios galegos e os da Unión Europea entre 1994 e 2001.

Esta actividade da Área de Economía do Seminario de Estudos Galegos, coordenada por Xavier Vence, e inscríbese no Ciclo de Actividades sobre "A Nova Culura Económica: o servidume neoliberal", que se van celebrar ao longo do presente ano.


0/5 (0 votos)