Vieiros

Vieiros de meu Perfil


Edición xeral

RSS de Edición xeral
RECLAMAN CAMBIOS NA LEI DE ESTRANXEIRÍA

SOS Racismo denuncia "apartheid xurídico" para os inmigrantes

"Nunca se observou unha manifestación tan grave de racismo en todas as súas dimensións". Esta é unha das afirmacións que recolle o Informe anual 2004 sobre o racismo no estado español elaborado pola ONG SOS Racismo, que se presentou hoxe, e no que se denuncia a "alarmante vulneración dos dereitos e libertades en España durante o ano 2003".

- 14:41 22/04/2004
Tags:

SOS Racismo denuncia que ata 2003 aplicábanse as leis de xeito discriminatorio, pero que en 2003 "aprobáronse directamente normas discriminatorias e aumentou o discurso político do mesmo signo". Segundo o informe, "o endurecemento da normativa específica para os cidadáns de orixe estranxeiro consolida un marco xurídico elaborado a partir de argumentos xenófobos e crea novos espacios de apartheid xurídico que negan a igualdade das persoas perante a lei".

Esta normativa considérase a orixe de que a cifra de estranxeiros en situación irregular acade o millón de persoas.

A coordinadora do informe, Isabel Martínez Luna, sinalou que os cambios da lexislación provocaron que os inmigrantes entrasen de forma irregular no país e que se puñeran en mans de mafias, xerando "un colectivo de man de obra barata, submisa e sen dereitos". Neste senso, SOS Racismo alerta da situación de desprotección na que están moitos menores estranxeiros.

O Informe anual 2004 sobre o racismo no estado español tamén salienta o "caos e falta de medios das oficinas de estranxeiría e a situación alarmante das zonas fronteirizas, onde o Goberno delega a súa función de control nas compañías de transporte, que deben actuar como policías de aduanas".

SOS Racismo reclama a suspensión das ordes de expulsión e que se regularice a calquera persoa que demostre que está traballando, sen que teña que volver ao seu país para obter o visado. Tamén solicitan a revogación da posibilidade de acceso policial aos datos do padrón e da potestade de control das compañías de transporte nas fronteiras.

INMIGRACIÓN, DELINCUENCIA E TERRORISMO

A ONG acusa aos políticos de ter feito un uso electoralista da inmigración, vinculándoa coa delincuencia e culpando aos inmigrantes dos problemas sociais.

No Informe anual 2004 sobre o racismo no estado español, SOS Racismo advirte que, despois dos atentados de Madrid, cómpre actuar coa máxima responsabilidade fronte ás actitudes racistas e xenófobas que se están a producir.

"Hai que frear esas reaccións dende a sociedade civil, os poderes públicos e os medios de comunicación", manifestou o portavoz da organización, Diego Lorente, que tamén expresou a necesidade de "romper o binomio que vincula inmigración e terrorismo internacional"

Sobre este punto, SOS Racismo insta aos medios de comunicación para que deixen de utilizar a expresión terrorismo islámico e a cambien pola de terrorismo fundamentalista ou terrorismo sen máis.


Ligazóns

0/5 (0 votos)