Vieiros

Stevedoring Services of America, con sede en Seattle, é a mpresa privilexiada pola Axencia estadounidense para o Desenvolvemento Internacional co gorentoso contrato de 4,8 millóns de dólares para a reconstrucción e a xestión do porto iraquí de Um Qasar. A administración Bush proxecta outros oito contratos a empresas civís por un total de 900 millóns de dólares de cara á reconstrucción de Iraq, malia que neste caso serían adxudicados no momento de rematar a guerra. O pequeno número de empresas ás que se lle permitiu competir por estas talladas e a pouca transparencia do proceso están sendo obxecto de fortes críticas.

“Os cidadáns, coa atención posta na invasión iraquí, descubrirán demasiado tarde o que os republicanos están facendo. Liderados por Bush, Congreso e Senado diríxennos cara unha década de desastre orzamentario”. O influínte New York Times bate forte este martes no seu editorial contra os problemas económicos que se veñen enriba.

As bolsas pecharon o luns á baixa e non apuntan mellor para este martes, mentres o petróleo volve ás carreiras cara os números máis altos. O espellismo optimista caeu co público recoñecemento dende a administración Bush dun conflicto que vai para longo.

O presidente dos EEUU fai este martes petición oficial de fondos para o orzamento especial da guerra, serán máis de 60 mil millóns de dólares e na análise que presentará no Congreso sublíñase unha duración da guerra de non máis dun mes. Segundo a Casa Branca, a partida orzamentaria incluiría 500 millóns para axuda humanitaria, aínda que sen especificar en que modo está se levará a cabo, e 1.700 millóns para a reconstrucción de Iraq.

Ao fío dos prognósticos econmómicos, vén de coñecerse un informe do economista William Nordhaus que calcula un custo de ata 1,82 billóns de euros se a guerra se prolonga e o mercado petroleiro cambalea, e un custo de 93.400 millóns no caso de que se resolva axiña (entendendo por axiña dous meses como moito).