Vieiros

Vieiros de meu Perfil


Edición xeral

RSS de Edición xeral

'O Prestige debeu traerse para a ría'

A Estación de Bioloxía Mariña da Graña é unha institución científica que forma parte da Universidade de Santiago e que se dedica a fomentar a investigación en bioloxía mariña, e ao asesoramento en temas relacionadas coa fauna e flora marítima de Galicia. Francisco Javier Cristobo, Xefe da Estación, considera que o desastre non se xestionou de xeito correcto. Así nolo dixo nunha conversa mantida con Vieiros.

- 10:41 19/11/2002
Tags:

¿Cales son as consecuencias inmediatas da ruptura do Prestige?
As consecuencias inmediatas son obvias, a morte de todo o marisco e de todas as especies afectadas polo verquido de fuel. Pero ademais, vai morrer unha cantidade moito maior de animais microscópicos que non se ven, o plancton, que serve de alimento base para moitas outras especies. Na televisión adoitan amosar gaivotas petroleadas, pero a morte do plancton vai ter peores consecuencias a longo prazo.

Na túa opinión, ¿qué se debería facer para poder mitigar o desastre?
Recoller a máxima cantidade posible de fuel do mar e deixar que a natureza siga o seu curso e se recupere. Non se deben utilizar dispersantes para o petróleo nin ningún outro producto químico porque engadiría contaminación ao mar.

¿Canto tempo tardará en rexenerarse a costa?
Alomenos vai pasar un ano ata que se poida traballar nas zonas afectadas polo fuel. Pero para que cheguen a estar nas mesmas condicións que antes, van pasar moitos máis anos.

Tendo en conta as características de Galicia, o desastre é gravísimo, non?
Si, o desastre é moito máis grave en Galicia cá se fora noutra zona, pola gran riqueza marisqueira e pesqueira das nosas rías a nivel mundial. Ao mesmo tempo, o verquido vese agravado precisamente pola nosa orografía, porque o fuel queda empantanado nas rías.

¿Cres que se debería ter xestionado a retirada do buque doutra forma?
Eu creo que a Xunta non contactou cos técnicos adecuados. Calquera mariño mercante está acostumado a estas situacións e sabe o que facer, pode calcular todos os riscos. O Prestige debería traerse para dentro da ría desde o principio, sería moito máis fácil controlar unha ría contaminada que agora, que levaron o barco para mar adentro e o verquido ameaza a todas as rías e, ademais, é imposible e controlar polo vento e polas ondas.

Como biólogo mariño, estarás disgustado...
Si, traballamos na concienciación da xente e no respecto do medio ambiente para que logo pasen estas cousas...


5/5 (1 votos)


Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí: