Vieiros

Normalmente os novos doutores e os estudiantes de terceiro ciclo, logo de defenderen o seu traballo de investigación ou tese de licenciatura, teñen que agardar un tempo antes de ver publicada a súa tese, se é que non queda inédita. Un dos obxectivos primordiais da Asociación Internacional de Estudios Galegos, AIEG, é o de potenciar a investigación no ámbito universitario. Por iso, para fomentar o coñecemento interdisciplinar da vangarda dos estudios galegos e "presentar" estes novos investigadores, ofrécese un extracto ou un resumo destas novas aportacións, e habilítase un espacio no Foro para que os lectores poidan opinar e debater sobre cada un dos traballos. Por suposto, para coñecelos con maior vagar e profundidade precisarán aparecer en libro ou ben como artigos de maior extensión en revistas científicas e culturais. Ogallá esta iniciativa da AIEG sirva para aguilloar a súa publicación.

Algunhas das colaboracións que se ofrecen neste primeiro monográfico non son tan recentes, mais por se tratar de disciplinas habitualmente menos representadas nos estudios galegos -máis virados cara a filoloxía e a historia- decidimos incluílos para propiciar a súa difusión e darlles visibilidade. Neste monográfico recollemos traballos de socioloxía, educación, literatura e cine, traducción e pintura.

Periodicamente irán aparecendo novos monográficos sobre investigación recente. Se xa fixeches a defensa da túa tese e queres dala coñecer, escríbenos.