Vieiros

"A eliminación temporal do cobro da peaxe non é unha obriga contemplada na lexislación contractual entre o Estado e as sociedades concesionarias", argumentan desde o ministerio de Fomento en resposta a unha pregunta de Francisco Rodríguez, deputado do BNG no Congreso.

O mecanismo en casos de retención posibilita que a administración se poña en contacto coa empresa que xestiona a vía para que de xeito temporal suprima o cobro, levantando as barreiras e facilitando unha circulación fluída. Neses casos, o acordo implica que o goberno asuma o custo desa supresión.

O goberno español asegura que cando hai previsión de intensidade de tráfico "superior á habitual", a empresa concesionaria da A9 "pon operativas todas as cabinas de peaxe; sitúa persoal nas propias entradas da peaxe para distribuír o tráfico; inclúe persoal de reforzo para emerxencias; e infórmalle aos usuarios que circulan pola autoestrada da existencia de retencións a través de paneis de sinalización nas propias entradas".

O exemplo de Guísamo este verán
En resposta á pregunta formulada por Francisco Rodríguez, o ministerio de Fomento argumenta que "no incidente da A9 entre Miño e Guísamo coincidiron tres circunstancias moi concretas: a celebración do Festival Celta de Ortigueira, masiva afluencia ás praias e a celebración da Feira Medieval de Betanzos". Malia recoñecer esa situación, Fomento non prevé que no futuro e nas mesmas circunstancias se vaia levantar a peaxe para evitar as retencións de horas e as colas de até 10 km.

Durante o pasado verán, só a vaga de lumes de agosto forzou a levantar as barreiras da A9 e moitos condutores queixáronse de que nun primeiro momento a empresa concesionaria seguiu cobrando portaxe malia as retencións e mesmo os cortes provocados polos incendios á beira da autoestrada.

Maior flexibilidade noutras comunidades
A Plataforma Cidadá pola Supresión da Peaxe en Rande lembraba a miúdo nas súas mobilizacións a significativa diferenza de procedemento entre Galiza e Cataluña.

Laiábanse os membros do colectivo de que as kilométricas retencións producidas na autoestrada galega A9 nunca eran atendidas co levantamento temporal das peaxes. Ao respecto, a asociación cidadá poñía de exemplo a Cataluña, onde, segundo argumentaban, ao haber un número elevado de vehículos agardando atrás de cada unha das cabinas, si se contribuía a afrouxar a intensidade do tráfico facilitando o paso sen pagar.

Nos últimos dous anos, as concesionarias catalás aplicaron tamén descontos especiais coincidindo con datas como as vacacións de Semana Santa. O sistema vai vencellado á propia fidelización dos usuarios ás tarxetas de pagamento estabelecidas polas empresas, e aplica reducións de até o 40% sobre as taxas habituais.