Vieiros

"Galiza e o goberno necesitan un interlocutor sólido e estábel con que poidamos falar en serio dunha vez do Estatuto de Autonomía", expuxo Emilio Pérez Touriño este mércores, comentando que "naturalmente a oposición ten que seguir facendo oposición", pero engadindo que o líder dos populares galegos debera antes "arranxar os problemas internos que poida ter". "Xa é hora, señor Feijóo, de que se aplique á tarefa", pediulle.

Touriño insistiu en que espera poder chegar a acordos concretos para avanzar na reforma estatutaria na próxima reunión, o día 15 de novembro, co líder do PPdeG. "Galiza agarda que avancemos, e non para copiar a ninguén, senón para crear o noso espazo propio", indicou, pedíndolle "unha actitude positiva que nos permita compartir" e engandindo que "non podemos estar pendentes dun partido, o que vostede dirixe, que vai a rastras".

Do outro lado, Núñez Feijoo opinou que Touriño chega á xuntanza para o relanzamento do proceso estatutario "coas mans atadas", explicando que chega condicionado polo seu socio de goberno, "tendo en conta que o BNG xa lle anunciou que racharía o pacto de goberno se o futuro Estatuto de Galiza sae a referendo a menor nivel que o catalán e se o PsdeG pactara co PP como en Andalucía".

Feijóo criticou que "nun terzo da lexislatura cesaron a terceira parte dos números dous" do goberno e, "se se ten en conta que Touriño so pode cesar en seis consellarías, vostede fixo profundos cambios case no 70% destas". Ao tempo, insistiu no desacordo en temas clave entre membros do executivo socialistas e nacionalistas.