Vieiros

"O urbanismo ten un límite", laiábase Manuel Vázquez en visita ao concello de Oia. O conselleiro de Medio Ambiente recoñeceu o impacto dos recentes incendios forestais no agravamento das consecuencias das recentes riadas, debido á falta de vexetación nos montes. Pero Vázquez advertiu que as causas fundamentais das catástrofes acontecidas, á beira dos intensos trebóns de auga logo de varios anos de seca, hai que buscalas no "crecemento urbanístico incontrolado" que veu bloqueando sen previsión ningunha espazos naturais estratéxicos.

O conselleiro avanzou que varios grupos de traballo están sendo despregados con urxencia nas zonas afectadas, realizando o seu labor en estreito contacto coas autoridades locais, para a recuperación dos leitos dos ríos, así como a súa apertura directa ao mar onde é posíbel, coa fin de evitar os desbordamentos.

O PP desbota a explicación urbanística
Con responsabilidade urbanística durante os últimos 16 anos, o PPdeG evita considerar a interpretación realizada por expertos e polo goberno actual sobre o impacto urbanístico na orixe dos asolagamentos destes días. Así, a explicación dos populares ten que ver unicamente coa vaga de lumes deste verán, insistindo en que "o PP demandou a posta en marcha dun plan de continxencias específico, precaución que non foi adoptada para evitar a catástrofe actual".

Agora, a Xunta pídelle á consellaría de Pesca a posta en marcha dun plan de actuación en dúas frontes "limpeza e rexeneración dos bancos marisqueiros afectados polo arrastre de borralla e restos dos incendios e unha liña de axudas económicas dirixidas aos mariscadores afectados, mentres non se consigan rexenerar os areais que presentan mortaldades elevadas".

En rolda de prensa este luns, o líder do PPdeG, Alberte Núñez Feijoo, referiuse ao "penoso espectáculo de desorganización de Protección civil no que se refire á protección das poboacións contra as riadas de cinza que baixan dos montes". Os populares recuperan as súas denuncias contra a actuación de Protección Civil durante o pasado mes de agosto e din agora que "temos que asistir agora ao espectáculo de desorganización do mesmo organismo".