Vieiros

"Unha vez que abren o melón hai que entrar a el", comentou Juan Juncal na súa comparecencia diante da comisión para a reforma do Estatuto ao tempo que defendía que Galiza aspire a todas as competencias posíbeis dentro do marco lexislativo constitucional. Paradoxalmente, Juncal subliñara antes o seu escepticismo sobre a necesidade de iniciar a reforma, agoirando mesmo "un novo reino de taifas" coa perda de competencias do goberno español en favor dos gobernos autonómicos. Na súa opinión nin o Estatuto é necesario nin o momento é o preciso para acometer a reforma.

Sen deixar o castelán en ningún momento, Juan Juncal tamén se posicionou en contra do deber de coñecer o galego, indicando que el está "pola liberdade e o dereito a escoller" e opinando que "en Galiza practícase o bilingüismo con absoluta normalidade". Segundo Juncal, "a lingua débese usar por convicción e non por imposición". De paso, o alcalde ferrolán considerou que a inclusión do termo "nación" no Estatuto implicaría unha perspectiva "excluínte con respecto a España".

Sobre a intervención de Juncal pronunciouse o presidente do PPdeG, Alberte Núñez Feijoo, quen dixo que el e o alcalde de Ferrol non teñen a mesma opinión sobre a reforma estatutaria e asegurou que o seu partido está totalmente comprometido co proceso aberto.

Por outro lado, desde o PSdeG ferrolán criticaron que Juncal "esqueceu defender os intereses da súa cidade" e laiábanse de que o rexedor aproveitase o seu tempo no Parlamento galego para defender "un centralismo caduco". Doutra beira, desde a dirección do PSdeG comentaron durante a xornada a rifa aberta con Núñez Feijoo polo modelo de pleno para o debate do Estatuto, destacando que "o tempo dos portavoces dos grupos será máis do dobre do dunha comparecencia habitual" e advertindo que as queixas do líder popular virían dadas polo seu desacougo ao verse na necesidade de ter que "explicarlles a todos os galegos se está a favor da reforma estatutaria que Galicia necesita ou da estratexia de Rajoy e Acebes". Segundo Ismael Rego, voceiro socialista na cámara galega, "Núñez Feijoo navega nunha indefinición tan grande que ata confunde e contamina aos integrantes do seu partido, como se apreciou hoxe na comparecencia do alcalde de Ferrol na comisión de reforma".