Vieiros

Músicas do mundo e máis
No Clavicémbalo de Lugo poderemos ver ao rockeiro de Ortigueira Manel López o venres, e aos coruñeses Mistakens, co seu son setenteiro, a noite do sábado. A entrada custa 5 €.

O hiphopeiro Juaninacka pasará o venres polo Rock Club ourensán ás 00:30 (12/14 €), e o sábado pola Iguana de Vigo á mesma hora (13/15 €). Na mesma Iguana, o domingo teremos a Death Before Dishonor, ás 22:00, por oito euros. A cantautora Silvia Penide estará o venres ás 23:00 co seu último traballo discográfico, Invisible na Abacería O Renque, tamén en Ourense.

Seguimos por Vigo: no Club Vademecum teremos o sábado, dende a unha da mañá, a Festa de Presentación da Red Bull Music Academy 2006, co dillei austríaco Patrick Pulsinger e o Colectivo Arkestra, vigués. O domingo 30 despedimos abril, aproveitando que ao día seguinte é festivo, coa Southern Arts Society, un grupo peninsular. O prezo é de 10 €, 8 coa entrada anticipada e 5 para as persoas socias. Seguindo por Vigo adentrámonos no Churruca: no pub Glin Glo, Saldos Arias, Fastop e All the Cream tocan ás dez do sábado, por unha entrada de 3 €. No Café UF, na Rúa Praceres, gozaremos do jazz de Arturo Villa e Álex Touceda o venres, por 3 €, e de JAZZUF = MCX² o sábado, con entrada libre. Os dous ás 23:30.

Na Mardi Grass coruñesa teremos o pop dos zaragozanos DA o venres ás 22:30. O sábado, á mesma hora, auténtico power pop compostelán e ourensán: estarán Sebastopol e Annie Hall. A entrada custa 3 €. Sen nos mover da Coruña, teremos no Playa Club, a Ainara LeGardon o sábado.

E en Compostela, dentro do ciclo Sons da Diversidade, o Auditorio de Galicia acolle o concerto de Toumani Diabaté, o gran virtuoso da cora, que vén dende Malí para amosarnos os sons deste instrumento de corda. O concerto será o venres ás 21:00, e a entrada custa 15 € ou 7.5 para estudantes e persoas xubiladas ou paradas. No mesmo Auditorio e á mesma hora teremos o sábado a presentación da Federación Galega de Bandas de Música Popular (FGBMP).

Xa noutro circuíto, no Ambigú tocan, o venres pola noite, o ex-Blood Filhoas Boy Elliot con Roger Willoughby. O concerto será en torno ás 21:30 e a entrada custa 3 €.

Teatro e danza para todos os gustos
Á mesma Compostela chega Teatro do Atlántico coa súa última montaxe, A raíña da beleza de Leenane. Estarán no Teatro Principal venres e sábado ás 21:00. As entradas van de 3 a 7 €, segundo a localidade. Por outra banda, na Sala Yago temos A natureza do animal, venres ás 20:30 e sábado ás 22:30. Humor grotesco e traxicómico da man do director Jorge Rey. Na mesma sala, o domingo ás 12:30, os máis pequenos poden ver os títeres de Cachirulo, El-rei Artur e a abominable dama.

E na NASA, o mimo belga Joseph Collard ofrecerá dúas fucións do seu espectáculo Zic-zag venres e sábado ás 22:00. Teremos oportunidade de gozar dun dos mellores clowns da escena europea. Na mesma sala, o domingo viviremos, ás oito, unha nova experiencia: JAMDANSANASA. Trátase amosar en quente o corpo máis vivo da danza contemporánea en Galiza.

Cinema
A última das proxeccións da Asociación luguesa Alto Minho para este mes é O sangue do cóndor, (Yawar Mallcu, 1969), un revelador filme de Jorge Sanjinés sobre as condicións de vida dos quechua. A cita, coma sempre, o domingo ás 20:00 no local da Asociación, na Rúa Catasol.

Mesas redondas
A ferrolá Cooperativa Xoaninha celebra a última das mesas redondas do mes, coma todos os venres, ás 18:30 no Centro Cultural Carvalho Calero. Esta vez, o tema é a nutrición, dende o enfoque ecoloxista.

Seguimos celebrando o 25 de abril
Ou polo menos na Fundaçom Artábria continúan coa festa: o sábado, a partir das 21:00, celebran unha festa co cantor compostelán José Constela e máis música portuguesa, e coma "petiscos", feixoada e caldo verde, ademais de viños de alén do Miño. O domingo continúan coa festa, esta vez para celebraren outra efeméride: a partir das 20:00 inauguran unha exposición fotográfica con motivo do primeiro de maio, día do Internacionalismo Proletario. A mostra aborda as dúas reconversións navais padecidas pola comarca de Ferrolterra, da man dos fotógrafos Pepe Mouriz e Gabril Tizom. E despois, repichoca...

Gargalladas en Silleda... Na súa V Semana do Humor, Silleda oferta todo tipo de actividades para que nos doa o bandullo de rir: o venres teremos no Auditorio, ás 22:30, ao mimo e clown británico que saltou á pantalla grazas a Harry Potter, Les Bubb. Á mesma hora e no mesmo sitio, Rafael Álvarez el Brujo estrea o seu espectáculo en Galiza o sábado. E o domingo, trío de monologuistas galegos: Nancho Novo, Javier Veiga e Luis Piedrahita xúntanse por primeira vez nun escenario. A fin de semana, ademais, Cándido Pazó estará na casa da cultura compartindo as súas técnicas do monólogo con maiores de 16, e polos bares estarán tamén cos seus soliloquios Ricardo de Barreiro, a quen puidemos ver na Sala Yago compostelá con Merda, Miguel Lago e Soledad Felloza.

... E champiñóns en Ordes
A cita gastronómica da semana témola en Ordes: os devoradores de cogumelos poden achegarse o domingo ao Campo da Feira, de 10:00 a 21:00 horas, para gozar, nesta decimoséptima Festa do Champiñón, das doce toneladas de setas que estarán alí preparadas para a degustación. Os actos comezarán o sábado, coa exposición dos 150 stands de Expofegasa, con diferentes actividades comerciais. Ás seis haberá un desfile de moda na discoteca LP 45. Pola rúa actuarán gaiteiros e as charangas Ruada e NBA, e á noite do domingo (lembremos que o luns non se traballa!) gran verbena con Bruma e o trío Solymar. O domingo coincide no mesmo Campo da Feira a novena feira do queixo, e tamén poderemos degustar este exquisito produto.

Polo Lérez abaixo...
Pontevedra está tamén de festa esta fin de semana: o Lérez é o protagonista, recén saneado. Ao longo do domingo, en varios puntos da ribeira do río poderemos atopar concertos coma o de Mercedes Peón e Xosé Manuel Budiño, ou espectáculos de luz e son. E a quen lle apeteza, e se o tempo acompaña, pode imitar ao alcalde da Boa Vila, Miguel Fernández Lores, e darse unha chapuzada.