Vieiros

A historia da selección galega de fútbol profesional, a súa simboloxía, as posibilidades das outras seleccións galegas para se constituíren como tal, novas, entrevistas, destaques históricos... Son só algúns dos contidos do Canal Seleccións.

Contidos sempre interactivos: poderedes deixar os vosos comentarios ao pé dos textos, escoller o voso once inicial de entre unha completísima lista de xogadores galegos de Primeira, Segunda, 2ªB e Terceira -que nos poderedes axudar a ampliar-, darlle ánimos aos seleccionados, debater libremente no Foro Seleccións e descargar cancións do famoso disco que sacou a revista Bravú en 1997, co retrouso Selección Galega Xa!

O último partido da selección galega desputouse en 1936. Non era oficial. Xogárono soldados galegos que loitaban pola República no V Rexemento de Líster. Algúns deles participaran, como selección galega, nas Olimpíadas populares de Barcelona.

Agora a circunstancia é distinta. O fútbol galego ten a súa selección, e non por iso transgrede ningunha norma. En palabras do director xeral de Deportes, Santiago Domínguez Olveira, a da selección galega "non era unha cuestión política".

Trátase unicamente de cubrir unha necesidade do fútbol galego que xa estaba cuberta en todas as autonomías agás Murcia. Non era sen tempo.