Vieiros

Na escolma do máis salientábel dos últimos días atopamos a OLucas, un macedán que está a estudar nos Estados Unidos e que no seu blog Perturbación aleatoria (en Texas) nos conta as súas vivencias nun dos estados máis pintorescos de Norteamérica. Recentemente estivo de viaxe por Florida, onde visitou os Estudios Universal, aproveitando as vacacións de Acción de Grazas.

No mesmo continente, pero case na outra punta, Raul Marinho estivo de viaxe por Chile. O seu percorrido polo país durante o mes de novembro relátase detalladamente no seu blog, onde se poden ver tamén fotos espectaculares. Como conta na súa última entrada, nestes momentos debe de estar de viaxe de volta a outro Santiago, o de Compostela.

A vida dun bolseiro en Portoviejo, Ecuador, é o argumento de Nen frío nen calor, unha bitácora inaugurada en setembro que nos permite coñecer como é a vida no país sudamericano. O 14 de novembro fálanos do problema que ten co lixo a comunidade Agua Blanca. Tamén ten unha Cara b fotográfica na que se amosa o lado máis sorprendente da vida ecuatoriana, especialmente os carteis e pintadas nas rúas.

Volvendo a Europa, Caninhas escribe no seu recén inaugurado blog Vidas verticais sobre a súa recente viaxe a Finlandia e as diferenzas que pode atopar calquera turista que desexe facer unha visita ao país. A bastantes quilómetros de distancia, aínda que por latitudes semellantes, Cesare, en As túas balas, narra o día a día da súa vida en Escocia. Estes días subiu ao Sheriffmuir, un monte cunha paisaxe e fauna extraordinarias.