Vieiros

Vieiros de meu Perfil


Natalia Alonso

Un burka na pel

09:53 13/07/2010

Burka ou non burka? Esa é a cuestión. Cada vez son máis os concellos que deciden votar medidas prohibitivas con respecto ao uso do veo integral islámico na nosa sociedade. O debate está a chegar ata tal punto que Bibiana Aído, ministra de Igualdade, xa manifestou o seu temor a que rematemos con máis normativas municipais que vestimentas deste tipo.

O polémico anaco de tea omite a anatomía feminina, convértea en territorio vedado para os ollares. O corpo é unha propiedade privada que non lle corresponde á muller, senón ao seu amado amo, o único ser digno de contemplar ese obxecto que lle pertence por obra e gracia de Deus. Digamos que o burka son os pedreiros e a carne femia, unha leira para dar de pacer ás vacas.

Neste sofisticado primeiro mundo, tan libre e intelixente, temos claro que o veo integral é o símbolo do machismo máis exacerbado. Moitas das mulleres que o visten nin tan sequera poden decidir, presas do pánico. Outras teñen cravada, tan fonda, a súa condición subordinada, que non son capaces de cuestionar a situación que viven. Nosoutras, pola contra, somos quen de elixir. Somos unhas privilexiadas, é certo, pero non tanto como nos queren facer crer. O noso privilexio consiste en posuír pantallas (que non espellos) nas que mirarnos, voces electrónicas que nos dictan a definición do correcto, como debe ser a nosa vida, que roupa poñernos, cal é o peso ideal. Na gran civilización, tampouco existe o corpo feminino, existen esculturas esculpidas polo capitalismo. Máis tenue, case imperceptible, pero aquí, no epicentro do sistema, as autómatas industriais tamén levamos un burka na pel.

4,34/5 (32 votos)


Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí:



Natalia Alonso Ramos (Foz, 1983). Licenciada en Xornalismo. Logo de traballar en diferentes medios de comunicación privados do país, na actualidade está a rematar a súa tese de doutoramento na USC, onde tamén ten praza como investigadora. »



Anteriores...